23 Oct 2014

ഇതൊരു ഒന്നൊന്നര കാലഘട്ടം !!!

"ഞാനൊന്നു ഉറങ്ങിയാലോ എന്നാലോചിക്ക്യാ.. വല്ലാണ്ട് ക്ഷീണോം ഉറക്കം വരലും..."
നല്ലപാതി ഞെട്ടി... ക്ലോക്ക് നോക്കി. "നിനക്കെന്തു പറ്റി? ഇന്നലേം ഇതേ പോലെ തന്നെ ആയിരുന്നല്ലോ"

പിറ്റേന്ന് ഓഫീസ്സുണ്ടെങ്കില്‍ കൂടി 11:30 - 12:00 ആകാതെ ഉറക്കത്തെക്കുറിച്ച് ഞാന്‍ ആലോചിക്കാറില്ല. അപ്പോഴും ഒരു പുസ്തകം കയ്യിലെടുത്ത് 4 പേജുകള്‍ മറിയ്ക്കും. ഇപ്പൊ സമയം വെറും ആറരയേ ആയുള്ളൂ.. ഓഫ്ഫീസില്‍ നിന്ന് ഇരുവരും എത്തിയതേയുള്ളൂ.. ഭര്‍ത്താവിന്റെ ഞെട്ടലില്‍ കുറ്റം പറയാന്‍ പറ്റില്ല.

ഓഫീസില്‍ നിന്നു വന്ന ഉടനെ തന്നെ എങ്ങോട്ടെങ്കിലും പോകേണ്ടതുണ്ടെങ്കില്‍ യാതൊരു മടിയും കൂടാതെ വലിയ ഉത്സാഹത്തോടെ ചാടി പുറപ്പെടുന്ന ആളാണ്‌ ഞാന്‍. ഒരു മിനുറ്റ് വെറുതെ ഇരിക്കാന്‍ ഇഷ്ടമല്ല. എപ്പോഴും എന്തെങ്കിലും ചെയ്തോണ്ടിരിക്കണം. കൂടെ കൂടെ യാത്രകള്‍ പോകാനിഷ്ടം. വേറെ യാതൊന്നും ചെയ്യാനില്ലെങ്കില്‍ നടക്കാനോ, നീന്താനോ, ചുമ്മാ ഷോപ്പുകള്‍ കയറിയിറങ്ങാനോ, അല്ലെങ്കില്‍ എന്തെങ്കിലും ചിത്രം വരയ്ക്കാനോ, വായിക്കാനോ ഇരിക്കുന്ന ഞാന്‍ ഇതാ രണ്ടു മൂന്നു ദിവസമായി ഓഫീസില്‍ നിന്ന് വന്ന ഉടനെ ഏകദേശം രണ്ട് മണിക്കൂര്‍ ഉറങ്ങുന്നു. പിന്നെ എഴുന്നേറ്റ് എന്തെങ്കിലും കഴിച്ച് വീണ്ടും ഉറങ്ങുന്നു. ഒക്കെ പോരാത്തതിനു വണ്ടി ഓടിക്കുമ്പോ ഉറക്കം വരുന്നെന്ന പരാതിയും...

അങ്ങനെ ഈ ഉറക്കം വരലിനോടും ഉറങ്ങുന്നതിനോടും ഞാന്‍ അവയ്ക്ക് കീഴടങ്ങിക്കൊണ്ട് മെല്ലെ മെല്ലെ പൊരുത്തപ്പെടാന്‍ ശ്രമിച്ചു തുടങ്ങി. പക്ഷെ മാനസികമായി വിഷമമാണ്‌. കാരണം ഈ നേരം ഇന്നതു ചെയ്യണമെന്ന് മനസ്സില്‍ ആലോചിക്കുമെങ്കിലും വില്ലനായി ഉറക്കം വരുമന്നേരം.. മനസ്സെത്തുന്നിടത്ത് ദേഹം എത്തുന്നില്ല.

ഇനി അടുത്ത പ്രശ്നം - ഗ്യാസ്.
രാവിലെ ഭക്ഷണം കഴിച്ച് ഓഫീസ്സില്‍ പോയാല്‍ കുറച്ച് നേരം കഴിയുമ്പോ വയറിനൊക്കെ "ഒരു എന്തോ പോലെ".. പിന്നെ വായിലൂടെ 'ഗൃ ഗൃ' എന്നു പറഞ്ഞ് ഗ്യാസും. അതും ഉറക്കത്തില്‍ പോലും ഇടുന്ന ഉടുപ്പിന്റെ ഭംഗി ശ്രദ്ധിയ്ക്കുന്ന ഒരു ഫാഷന്‍ റീട്ടെയില്‍ ഓഫീസിലെ ജാടകളില്‍ ജാടകളായ ഒരു സംഘം സഹ പ്രവര്‍ത്തകര്‍ക്കിടയില്‍ ഇരുന്നുകൊണ്ടാണ്‌ ഈ "ഗൃ" "ഗൃ"... ഈ ശബ്ദം അടിച്ചമര്‍ത്താന്‍ ശ്രമിച്ച് ഞാന്‍ കൂലങ്കഷമായി ആലോചിച്ചു "ഇതെന്താ ഇങ്ങനെ ????"

പിന്നെ ക്ഷീണം.. 
ഉച്ചയ്ക്ക് ഫുഡ് കോര്‍ട്ട് വരെ പോയി തിരിച്ച് ഓഫീസിലേക്ക് വരുമ്പോള്‍ സഹപ്രവര്‍ത്തകയെ ഒരിക്കല്‍ പോലും ലിഫ്ട് എടുക്കാന്‍ സമ്മതിക്കാതെ സ്റ്റെപ്പുകള്‍ കയറ്റുന്ന ഞാന്‍ 'ഇന്നു ലിഫ്ട് എടുത്താലോ'എന്ന് അന്വേഷിച്ച് തുടങ്ങി. കാരണം ക്ഷീണം. ശാരീരിക ആരോഗ്യത്തിനു പടവുകള്‍ കയറുന്നതാണ്‌ നല്ലത് എന്ന് വിശ്വസിക്കുന്ന ഞാന്‍ ആ വിശ്വാസവും താഴെ വെച്ച് കീഴടങ്ങി. 

എന്നും കഴിയ്ക്കാറുള്ള ആപ്പില്‍ എന്ന ഫ്രൂട്ട് കണ്ടാല്‍ വല്ലാത്ത ദേഷ്യം. പണ്ടെപ്പളോ എന്നെ ദ്രോഹിച്ച പോലെയൊരു തോന്നല്‍...!!! അതിനെ നോക്കി കണ്ണുരുട്ടുമ്പൊ ഒരു സമാധാനം...!

എന്താ പറ്റിയത് ?
ഒരു 20 ദിവസം കൂടി കഴിഞ്ഞാല്‍ ഇന്തോനേഷ്യയിലെ ബാലിയില്‍ ട്രെക്കിങ്ങും റിവെര്‍ റാഫ്ടിങ്ങും ചെയ്യേണ്ട് ആളാണ്.  10 ദിവസത്തെ യാത്രയാണ്‌ പ്ലാന്‍ ചെയ്തിരിക്കുന്നത്.. 

പിന്നെ ഛര്‍ദ്ദി - ഇതെനിക്ക് പണ്ടു തൊട്ടെ പ്രശ്നമല്ല. വീട്ടില്‍ വെയ്ക്കുന്നതോ അല്ലെങ്കില്‍ അത്രയ്ക്കും നല്ല എണ്ണ ഉപയോഗിക്കുന്നതോ ആയ എണ്ണ പലഹാരം, അല്ലെങ്കില്‍ എണ്ണ ഉപയോഗിച്ചുള്ള കറി എന്നിവ മാത്രമേ എനിക്ക് പിടിയ്ക്കുള്ളൂ.. അല്ലാത്തവ  കഴിച്ചാല്‍ ഞാന്‍ മിനിറ്റുകള്‍ക്കുള്ളില്‍ തന്നെ അത് പുറത്തേക്ക് തള്ളും. എത്ര ആക്രാന്തത്തോടെ ആസ്വദിച്ച് കഴിച്ചതാണെങ്കിലും കുടലു പോലും പുറത്തിയ്ക്ക് ഇട്ടെന്നപോലെ വാളുവെച്ച് ഞാന്‍ അതൊക്കെ ഔട്ട് ആക്കും. എന്നിട്ട് ഒന്നും സംഭവിക്കാത്ത പോലെ കൂളായി നടക്കും. 
അതോണ്ട് ഇത് ഞാനൊരു ഉപദ്രവമായി ഒരിക്കലും കരുതിയില്ല..

എന്നാലോ രാവിലെ ഇപ്പറഞ്ഞ പ്രശ്നങ്ങളൊന്നുമില്ല. രാവിലെ പഴയ പോലെ തന്നെ. ഉണര്‍വ്വോടും ഉഷാറോടും കൂടി നടക്കും. ഉച്ചയ്ക്കു ശേഷം പഞ്ചറായ ടയറു പോലെയും. 

കുറച്ച് ദിവസങ്ങള്‍ ഇങ്ങനെ കടന്ന് പോയി. അങ്ങനെയാണ് നമ്മള്‍ മനസ്സിലാക്കിയത് - ഇത് വലിയൊരു മാറ്റങ്ങള്‍ക്ക് വേണ്ടി എന്റെ ശരീരം തയ്യാറെടുപ്പ് നടത്തുകയാണെന്ന്‌. അതെ - ഇതാണ്‌ കേട്ടു പരിചയിച്ച ഗര്‍ഫം എന്ന ഗര്‍ഭം. 

അങ്ങനെ നമ്മള്‍ ഒഫീഷ്യലായി അത് സ്ഥിരീകരിച്ചു. ആദ്യ 3 മാസത്തേക്ക് വണ്ടി ഓടിക്കാന്‍ വിലക്കു വന്നതായിരുന്നു ആദ്യത്തെ ഇടിത്തീ. പിന്നെ കുനിയരുത്.. പടവുകള്‍ കയറരുത്.. ചാടരുത്.. നീന്തരുത്... ജിം പോകരുത്.. യാത്ര ചെയ്യരുത്.. ഇടക്കിടെ ചെറുതായി ഭക്ഷണം കഴിച്ചോണ്ടിരിക്കണം, വെള്ളം കുറെ കുടിക്കണം.  'വേണം' എന്ന വാക്കിനേക്കാള്‍ ഡോക്ടറുടെ അടുത്ത് നിന്ന് കേട്ടത് 'അരുത്' എന്ന വാക്കായിരുന്നു.

പിന്നെ വീട്ടുകാരെ അറിയിച്ചപ്പൊ എല്ലാര്‍ക്കും സന്തോഷമായെങ്കിലും കൂടെ ഞെട്ടല്‍, അത്‌ഭുതം, സഹതാപം എന്നീ വികാരങ്ങള്‍ മാറി മാറി വന്നു - പിന്നെയുള്ള ഉപദേശങ്ങള്‍ ഇങ്ങനെയായിരുന്നു - 'ഇനി കുട്ടിക്കളി പറ്റില്ല', 'ചാടലും ഓടലും കുറയ്ക്കണം', 'പഴയപോലെ സര്‍ക്കസും കസര്‍ത്തും പറ്റില്ലാട്ടോ ശ്രദ്ധിയ്ക്കണം'... അങ്ങനെ അങ്ങനെ... 

ഈ വാര്‍ത്ത ഞങ്ങള്‍ക്ക് രണ്ടു പേര്‍ക്കും കൌതുകമായിരുന്നു. അതിലേറെ അത്ഭുതകരവും. 

ഒരു കണക്കിനു പറഞ്ഞാല്‍ നമ്മടെ മലയാളം സിനിമകള്‍ ശരിക്കും വമ്പന്‍ പാരയാണ്‌ എന്നോട് പണിഞ്ഞിരിക്കുന്നത്.. അതില്‍ "കല്യാണം കഴിക്കുന്നു. ഭാര്യ ഗര്‍ഭിണിയാകുന്നു. ഒരു തവണ ഛര്‍ദ്ദിക്കുന്നു. പിന്നെ എല്ലാം വളരെ എളുപ്പം. മുഖത്ത് സന്തോഷം മാത്രം. അവസാനം പ്രസവിയ്ക്കാന്‍ നേരം 'അയ്യോ അമ്മേ.. ആ ആ....' എന്നൊക്കെ പറഞ്ഞു നിലവിളിയും. പിന്നെ വീണ്ടും ചിരി.. എല്ലാ വേദനയും തീര്‍ന്ന പോലെ.."

പക്ഷെ യഥാര്‍ത്ഥ ഗര്‍ഭം ഇങ്ങനെയല്ല. സംഭവം ടോപ് സംഭവം തന്നെയാണ്. ലോകത്തില്‍ എത്രയോ പേര്‍ ഗര്‍ഭിണികളാകുന്നു എന്നു ചിലര്‍ പറയും. അതെ.. ഇത് കാലാ കാലങ്ങളായി എല്ലാരും അനുഭവിക്കുന്നതാണ്. ലോകത്തിലെ ഏറ്റവും കാശുള്ള സ്ത്രീ മുതല്‍ ദിനരാത്രങ്ങളില്ലാതെ കല്ലും മണ്ണൂം ചുമന്ന് പണി ചെയ്യുന്ന സ്ത്രീ വരെ .. എന്നു പറഞ്ഞ് അത് എളുപ്പമുള്ള കാര്യമല്ല എന്ന് മനസ്സിലായത് ഇപ്പോഴാണ്. നമ്മള്‍ പലപ്പോഴും എല്ലാരും ചെയ്യുന്ന കാര്യത്തെ നിസ്സാരവത്ക്കരിച്ചു കാണാറുണ്ട്. പക്ഷെ യാഥാര്‍ത്ഥ്യം മറ്റൊന്നാണ്. ഓരോരുത്തര്‍ക്കും ആ കാലഘട്ടം ഓരോ പോലെയാണ്. എനിക്ക് - ഇത് ഒരു ഒന്നൊന്നര കാലഘട്ടം തന്നെയാണ്.  അല്ലേലും മനസ്സും ശരീരോം ഓരോ പോലെയല്ലേ ഓരോരുത്തര്‍ക്കും.. 

ഞാനും ഭര്‍ത്താവും അത്ഭുതത്തോടെ അത് മനസ്സിലാക്കാന്‍ തുടങ്ങി. വലുതായി ദേഷ്യം വരാത്ത, കരയാത്ത, സങ്കടപ്പെട്ടിരിക്കാത്ത ഞാന്‍ ഇടയ്ക്ക് ചെറിയ കാര്യങ്ങള്‍ക്ക് വിഷമിക്കുന്നു ദേഷ്യപ്പെടുന്നു, ചിലപ്പൊ കരയുന്നു... അതും ഏങ്ങിയേങ്ങി... അന്നേരം യാതൊരുവിധത്തിലും എന്നെ സമാധാനിക്കാന്‍ അങ്ങോര്‍ക്ക് പറ്റില്ല. പിറ്റേന്ന് ഇതാലോചിക്കുമ്പോ നമ്മള്‍ രണ്ടു പേരും ചിരിയ്ക്കും .. എനിക്കാകെ ചമ്മലും. 
പിന്നെ നമ്മള്‍ ഇതെല്ലാം പുതിയ പലതരം ഹോര്‍മോണുകളുടെ വികൃതികളാണെന്ന് മനസ്സിലാക്കി. 

പിന്നെയോ... 
വയറു വലുതാകുന്നതിന്റെ ഭാഗമായി അതിന്റെ വികസിക്കാനുള്ള ശ്രമവും അവിടത്തെ തൊലിയിലെ വേദനയും ചൊറിയും... ദൈവമേ !!!!! എണ്ണയും ക്രീമും തേച്ച് വയ്യാണ്ടായി.... എന്നു മാത്രമല്ല നാലു പേരുടെ മുന്നില്‍ നില്‍ക്കുമ്പോ വയര്‍ ചൊറിയാനുള്ള ഒരു നിയന്ത്രിക്കാനാകാത്ത തോന്നലും.. 

അടുത്തത് എന്നെ വളരെ ബുദ്ധിമുട്ടിയ്ക്കുന്ന ഇപ്പോഴും ബുദ്ധിമുട്ടിച്ചുകൊണ്ടിരിക്കുന്ന പ്രശ്നമാണ്. ഈ കുഞ്ഞന്‌ വളരാന്‍ എന്റെ ഗര്‍ഭപാത്രം തയ്യാറെടുക്കുകയാണ്‌.. വലുതാകേണ്ടതുമുണ്ട്.. പക്ഷെ അത് എന്റെ യൂറിന്‍ ബ്ലാഡറെയും കുടലിനെയും അടിച്ചമര്‍ത്തിയാണ്‌ ആ തയ്യാറെടുപ്പ് നടത്തുന്നതും വലുതാകുന്നതും. കുടലിനെ അടിച്ചമര്‍ത്തിയതുകൊണ്ട് ഒരല്‍പം ഭക്ഷണം മാത്രമേ ഒരുനേരം കഴിക്കാന്‍ പറ്റുള്ളു. അതും മെല്ലെ മെല്ലെ.. അല്ലാത്തവ ഡൈജസ്റ്റ് ചെയ്യാന്‍ സംവിധാനമില്ല. പക്ഷെ കുറച്ച് കഴിഞ്ഞാല്‍ വിശക്കും. അപ്പൊ വീണ്ടും ഇതു പോലെ കുറച്ച് കഴിച്ചേ തീരൂ. ഇല്ലെങ്കില്‍ സുഹൃത്തായ ഗ്യാസെത്തും. പിന്നെ ചോറ്, ബിരിയാണി, തുടങ്ങിയ അരി ഭക്ഷണം കഴിക്കാനേ ആകുന്നില്ല. അത് എത്ര മെല്ലെ കഴിച്ചാലും എത്ര കുറച്ചുമാത്രം കഴിച്ചാലും ഒരു 5 മണിക്കൂര്‍ കഴിഞ്ഞാല്‍ അതിഗംഭീരമായി വാളു വെയ്ക്കും. എന്നിട്ടോ ? ഉറങ്ങാന്‍ പോലും സമ്മതിക്കാതെ വില്ലന്‍ ഗ്യാസെത്തും. ഞാന്‍ ഉറങ്ങിയില്ല എന്നാല്‍ ഭര്‍ത്താവിനും ഉറങ്ങാനാകില്ല.. പിന്നെ അര്‍ദ്ധരാത്രിയ്ക്ക് എണീറ്റ് ഫ്ലാറ്റിന്റെ വരാന്തയിലൂടെ തലങ്ങും വിലങ്ങും നടന്ന് ഈ ഗ്യാസിനോട് യുദ്ധം ചെയ്യും.. ആകെ മൊത്തം കലുഷിതമായ അവസ്ഥയായിരിക്കും വീട്ടില്‍.. അല്ലെങ്കിലേ ഗ്യാസ് എനിക്കിപ്പൊ ഒരു പ്രശ്നമാണ്‌ - അത് അരി കഴിച്ചാല്‍ അക്രമകാരിയാകുന്നുമുണ്ട്.. അതോണ്ട് അരി നിര്‍ത്തി. ബിരിയാണിയോടുള്ള കൊതിയൊക്കെ പിന്നീടത്തെ അവസ്ഥ ആലോചിക്കുമ്പൊ തന്നെ തിരിഞ്ഞോടും.  ഞാന്‍ ഇപ്പൊ മറക്കാതെ കഴിക്കുന്ന ഒരു സാധനം ധന്വന്തരം ഗുളികയാണ്. ജയ് ധന്വന്തരം !!

മുന്നെ പറഞ്ഞതു പോലെ ഈ വളര്‍ന്നോണ്ടിരിക്കുന്ന ഗര്‍ഭപാത്രം അടുത്തതായി പണി കൊടുത്തത് എന്റെ യൂറിന്‍ ബ്ലാഡര്‍ക്കാണ്‌ (മൂത്ര സഞ്ചിയ്ക്ക്). വളരാനുള്ള സ്ഥലം അയല്‍ക്കാരനെ ഞെരുക്കിയാണ്‌ ഗര്‍ഭപാത്രം ഉണ്ടാക്കുന്നത്. അതു കൊണ്ടെന്തായി ? ഇടക്കിടെ മൂത്ര ശങ്ക... ഒരു തവണ പോയി തിരിച്ച് വന്നു ആ ക്ഷീണം മാറ്റി ഇരിയ്ക്കുമ്പോ വീണ്ടും ശങ്ക. 

മിക്കവാറും ഞാന്‍ ഞാനല്ലാതെയായ പോലെ... നമ്മള്‍ നമ്മളായി ഇരിക്കാന്‍ പറ്റാതെയായി.. നമ്മുടെ ജീവിത രീതികളും മാറി... പഴയ പോലെ എനര്‍ജിയില്ല. വിചാരിക്കുന്ന പോലെ ഒന്നും ചെയ്യാനാകുന്നില്ല. 

പക്ഷെ മാനസികമായി ഈ മാറ്റങ്ങളോട് പൊരുത്തപ്പെടാന്‍ നമ്മള്‍ക്ക് കുറച്ച് വിഷമമുണ്ടായി.. 'അരുതു' എന്ന വാക്ക് കൂടുതല്‍ കേട്ടു തുടങ്ങി.. ഛര്‍ദ്ദി, ഗ്യാസ്‌, ക്ഷീണം, മൂത്ര ശങ്ക, വയറു വേദന, ഇരിന്നോടത്തുനിന്ന് എണീക്കാന്‍ ഒരു ചെറിയ വിഷമം, ചില ഭക്ഷണങ്ങളോട് ഇഷ്ടമില്ലായ്മ, എന്നിവ തുടര്‍ന്നു കൊണ്ടിരിക്കുന്നു. 

3 മാസം കഴിഞ്ഞപ്പൊ വണ്ടി ഓടിക്കാന്‍ തുടങ്ങി. പക്ഷെ പുതിയ പ്രശ്നങ്ങള്‍ വന്നു തുടങ്ങി.  

ഒരു ദിവസം രാവിലെ ബെഡ്ഡില്‍ നിന്ന് എഴുന്നേല്‍ക്കാന്‍ നോക്കുമ്പൊ കാല്‍ പൊന്തുന്നില്ല. ഈ കാല്‍ വെച്ച് എത്ര മലകള്‍ കയറിയിരിക്കുന്നു.. ! എത്രയെത്ര മാരത്തോണുകള്‍ ഓടിയിരിക്കുന്നു..! എത്ര കിലോമീറ്ററുകള്‍ നടന്നിരിക്കുന്നു..! ആ കാലുകള്‍ക്ക് ഇപ്പൊ നിലത്തൂന്നാന്‍ പറ്റുന്നില്ല. തലേന്ന് രാത്രി 10-20 കിലോമീറ്ററുകള്‍ ഓടിയ പോലെ. പിന്നെ ഭര്‍ത്താവ് വന്ന് എന്തൊക്കെയോ മരുന്ന് പുരട്ടി തിരുമ്മി തന്ന് അതിനെ നിലത്തൂന്നാകുന്ന പരുവത്തിലാക്കി..  എന്നിട്ട് നമ്മള്‍ അന്യോന്യം നോക്കി - 'ഇതൊക്കെ ഉണ്ടാകുമായിരിക്കുമല്ലേ ?' എന്ന ഭാവത്തില്‍.  പിന്നെ കുറെ ചിരിച്ചു. ഇനിയുമുണ്ടോ ആവോ ഇതുപോലത്തെ വിചിത്രമായ ആചാരങ്ങള്‍...?

മറ്റൊരു ദിവസം പ്രശ്നക്കാരന്‍ തലവേദനയായിരുന്നു. ഓര്‍മ വെച്ച് കാലം തൊട്ടു തലവേദന എന്ന സംഭവം അടുത്ത് കൂടെ പോയിട്ടില്ല.. പക്ഷെ അന്ന് തലയില്‍ ആരോ വലിയ ഭാരം വെച്ച പോലെ. നെറ്റിയൊക്കെ പോളിയണ പോലെ.

അതുവരെ എന്റെ ഭര്‍ത്താവും ഞാനും വിചാരിച്ചിരുന്നത് സ്ത്രീയായാലും പുരുഷനായാലും ഒക്കെ ഒരു പോലെ തന്നെ. ഒരേ പ്രശ്നങ്ങള്‍.. ഒരേ ആവശ്യങ്ങള്‍.. പക്ഷെ ഒരു 4 മാസം ഗര്‍ഭകാലം കഴിഞ്ഞപ്പൊ ലോകത്തിലെ സകലമാന സ്ത്രീകളെയും നമ്മള്‍ രണ്ട് പേരും  നമിച്ചു പോയി... 

ഇപ്പൊ 6 മാസം കഴിഞ്ഞപ്പൊ നമ്മള്‍ക്ക് ആകസ്മിതകളെയും പുതിയ പുതിയ അനുഭവങ്ങളെയും വരവേല്‍ക്കുന്നത് ശീലമായി മാറി. ഇടത്തോട്ടോ വലത്തോട്ടോ മാത്രം തിരിഞ്ഞു കിടക്കുക, എന്തെങ്കിലും നിലത്തു വീണാല്‍ കുനിയാതെ മുട്ടു മടക്കി ഇരുന്നു അതെടുക്കുക, ആരു പെട്ടന്നു വിളിച്ചാലും സ്വന്തം സമയം എടുത്ത് മെല്ലെ മാത്രം എഴുന്നേല്‍ക്കുക, മെല്ലെ നടക്കുക, ഓഫീസിലാണെങ്കിലും അധിക നേരം ഇരിക്കാതെ ഇടക്കിടെ എഴുന്നേറ്റ് ഒന്നു ചെറുതായെങ്കിലും നടക്കുക, ഇരിക്കുമ്പോ കാല്‍ ഉയര്‍ത്തി വെക്കുക തുടങ്ങി കുറെ കാര്യങ്ങള്‍.. 

ഇതെല്ലാം നമ്മടെ പഴയ ദിനചര്യകളില്‍ നിന്നും സ്വഭാവത്തില്‍ നിന്നുമൊക്കെ വ്യത്യസ്തമാണെങ്കിലും മൂന്നാം മാസത്തിലും ആറാം മാസത്തിലും എടുത്ത അള്‍ട്ര സൌണ്ട് സ്കാനിങ്ങില്‍ കുട്ടി ഇളകുന്നതും കളിക്കുന്നതും കൈ വെച്ചിരിക്കുന്നതുമൊക്കെ കണ്ടത് ഓര്‍ത്താല്‍ "ഓ.. സാരല്ല്യാ... ഇനി കുറച്ചു മാസങ്ങള്‍ കൂടി സഹിച്ചാല്‍ മതീലോ" എന്ന് തോന്നിപോകുന്നതുകൊണ്ടും പിന്നെ സാഹചര്യങ്ങള്‍ നമ്മളെ രണ്ടു പേരെയും മികച്ച പോരാളികള്‍ ആക്കിയതു കൊണ്ടും കുഴപ്പമില്ലാതെ പോകുന്നു. ഉറക്കമില്ലാത്ത രാത്രികളും തല തൊട്ട് പാദം വരെയുള്ള ഭാഗങ്ങളിലെ പലവിധ വേദനകളും ഭാവ വ്യത്യാസങ്ങളും മാനസികവും ശാരീരികവുമായ വിഷമങ്ങളും തുടര്‍ന്നും നല്ല സ്പോര്‍ട്ട്മാന്‍ സ്പിരിറ്റില്‍ ഏറ്റെടുക്കാന്‍ കഴിയട്ടെ എന്നു സ്വയം ആശംസിച്ചുകൊണ്ട് ഒരു "ഗൃ" ശബ്ദത്തോടെ തല്‍ക്കാലം നിര്‍ത്തുന്നു. 

സമര്‍പ്പണം : ഗര്‍ഭിണികളായ എല്ലാ സ്ത്രീകള്‍ക്കും അവരെ സ്നേഹപൂര്‍വ്വം മനസ്സിലാക്കുന്ന എല്ലാ ഭര്‍ത്താക്കന്മാര്‍ക്കും ... 

(പൊതുവെ ഗര്‍ഭകാലത്ത് കുട്ടിയെ വരവേല്‍ക്കുന്ന സന്തോഷത്തെക്കുറിച്ചും  ആവേശത്തെക്കുറിച്ചും പിന്നെ ആ സമയത്തെ വ്യായാമങ്ങളെക്കുറിച്ചും അതുമല്ലെങ്കില്‍ പ്രസവത്തിനുശേഷമുള്ള മാതൃത്വത്തെക്കുറിച്ചും മാത്രമേ കൂടുതല്‍ എഴുതികണ്ടിട്ടുള്ളു.. ഇവിടെ ഗര്‍ഭകാലത്തെ ഞങ്ങളുടെ തോന്നലുകളും അനുഭവങ്ങളും വിവരിക്കാമെന്നു തോന്നി - അങ്ങനെ എഴുതി. )

19 Aug 2014

മഹാഭാരതവും രാമായണവും ഇന്ത്യയിലെ 'ഹിന്ദുമത'ക്കാരുടേത് മാത്രമാണോ ?

ഈ മഹാഭാരതവും രാമായണവും ഇന്ത്യയിലെ 'ഹിന്ദുമത'ക്കാരുടേത് മാത്രമാണോ ?

കഴിഞ്ഞ കുറച്ചു ദിവസങ്ങളായി ഫേസ്‌ബുക്കിലും മറ്റു സോഷ്യല്‍ സൈറ്റുകളിലുമായി വായിച്ച അഭിപ്രായങ്ങള്‍ കണ്ടപ്പോള്‍ തൊട്ട് ചിന്തിച്ചു തുടങ്ങിയതാണ്‌ ഈ കാര്യം. അതെങ്ങനെ ശരിയാകും?

എന്റെ അറിവില്‍ - നമ്മള്‍ ഇന്ത്യക്കാരെ "മത"ത്തിന്റെ പേരില്‍ നമുക്ക് രണ്ടായി [*1] തരം തിരിക്കാം. 
  1. ഏതാണ്ട് 80% ആളുകള്‍ ഒരു പ്രത്യേക മതത്തിലേക്കും മാറാത്തവരായി തുടരുന്നു.
  2. ഏതാണ്ട് 20% ആളുകള്‍ ഒരു പ്രത്യേക മത വിശ്വാസത്തിലേക്കോ ആരാധനാരീതിയിലേക്കോ മതം മാറ്റം ചെയ്യപ്പെട്ടവരാണ്‌.
    ആ മതം മാറ്റം സിഖു മതം, ബുദ്ധ മതം, ഇസ്ലാം മതം, ക്രൈസ്തവമതം എന്നിവയിലേക്കാണ്‌ കൂടുതലായും നടന്നിട്ടുള്ളത്. ഈ മതങ്ങളില്‍ ചിലത് ഇന്ത്യയില്‍ തന്നെ ഉത്ഭവിച്ചവയാണ്‌. മറ്റു ചിലത് ഇന്ത്യക്ക് പുറത്തുണ്ടായവയാണ്‌. 

ഇനി മതം ആയി പറയുകയാണെങ്കില്‍ മേല്‍പറഞ്ഞ ഒരു മതത്തിലേക്കും മാറാത്ത 80 ശതമാനമായ ഇന്ത്യക്കാരായ ആളുകളെ ഇന്ന് നമ്മള്‍ 'ഹിന്ദു മതക്കാര്‍' എന്ന്‌ വിളിക്കുന്നു. 'ഹിന്ദു' എന്ന വാക്ക് ഇവിടത്തെ എല്ലാവര്‍ക്കും ബാധകമാണ്‌. 'ഹിന്ദു' എന്ന വാക്ക് ഒരു മതത്തിന്റെ മാത്രം ആള്‍ക്കാരെ കാണിക്കുന്നതല്ല എന്നതിനെക്കുറിച്ച് ഇന്നത്തെ ഇന്ത്യയുടെ പരമോന്നത നീതിപീഠമായ സുപ്രീം കോടതിയുടെ വിധി പോലുമുണ്ട്.

അതായത്... ഈ പറയുന്ന 80 ശതമാനവും 20 ശതമാനവും ഇവിടെ ഇന്ത്യയിലെ സനാതനധര്‍മം ആചരിച്ചവരായിരുന്നു. എന്നു പറഞ്ഞാല്‍ ഇന്ത്യയുടെ ചരിത്രം നമ്മുടെ എല്ലാവരുടേതുമാണ്‌. ഇന്ത്യന്‍ ചരിത്രം എന്നു ഞാന്‍ ഇവിടെ ഉദ്ദേശിക്കുന്നത് മുഗളന്മാരും പറങ്കികളും ബ്രിട്ടീഷുകാരും മറ്റും നമ്മുടെ മേല്‍ ആധിപത്യം കാണിച്ചിരുന്ന സമയത്തെ ചരിത്രമല്ല. ഇന്ത്യന്‍ ചരിത്രമെന്നത് അതിനു മുന്നെയും ഉണ്ട്. വേദകാലഘട്ടവും (Vedic age), മഹാഭാരതവും രാമയണവും ഉപനിഷദുക്കളും യോഗയും ആയുര്‍വേദവും എല്ലാം ഈ ചരിത്രത്തില്‍ ഉള്‍പ്പെടുന്നു. 

അപ്പോള്‍ മഹാഭാരതവും രാമായണവും നമ്മള്‍ ഇന്ത്യക്കാരുടേതല്ലേ ?
ഇത് ആ 80 ശതമാനത്തിന്ടേത് മാത്രമല്ല. 20 ശതമാനത്തിന്ടേത് കൂടിയാണ്‌. നമ്മള്‍ നമ്മളെ ഈ 80-ഉം 20-ഉം ആയി തിരിക്കേണ്ടതില്ല... നമ്മള്‍ ഇന്ത്യക്കാരായ 100 ശതമാനം ആളുകളുടെയും ചരിത്രമാണ്‌ ഇന്ത്യന്‍ ചരിത്രം. 

ഇനി - മഹാഭാരതത്തേയും രാമായണത്തേയും കുറിച്ച്.. 
നമ്മളില്‍ എല്ലാര്‍ക്കും തന്നെ രാമായണവും മഹാഭാരതവും അറിയാം. അതിലെ അയോദ്ധ്യയുടെയും ദ്വാരകയുടെയും അവിടത്തെ ആളുകളുടെയും കഥകള്‍ അറിയാം. അതില്‍ എവിടെയെങ്കിലും പറഞ്ഞിട്ടുണ്ടോ "നിങ്ങള്‍ 'ഇന്ന ദൈവത്തെ' മാത്രമേ പ്രാര്‍ത്ഥിക്കാന്‍ പാടുള്ളൂ" എന്ന്.  
ഇല്ല !
അതില്‍ തന്നെ ചിലര്‍ അഗ്നിയെ പൂജിച്ചവരായി കാണാം. ചിലര്‍ സൂര്യനെ. ചില ഋഷികള്‍ പരബ്രഹ്മത്തെ. ചിലര്‍ ഗുരുവിനെ. 
നിങ്ങളില്‍ പ്രാര്‍ത്ഥിക്കാന്‍ വിഗ്രഹം വേണമെന്നു തോന്നുന്നവര്‍ക്ക് ആ വിഗ്രഹത്തെ പ്രാര്‍ത്ഥിക്കാം. നിങ്ങളുടെ പ്രാര്‍ത്ഥനകള്‍ ആ പരബ്രഹ്മത്തിലേക്കെത്തും. പരബ്രഹ്മമെന്നാല്‍ രൂപമില്ലാത്ത ലിംഗമില്ലാത്ത ഒരു ശക്തിയാണ്‌.
ചിലര്‍ ആ ശക്തിയെ പ്രകൃതിയും പുരുഷനുമായി ആരാധിച്ചു. ചിലര്‍ മറ്റു വിഗ്രഹങ്ങളിലൂടെ ആരാധിച്ചു.
ഇനി നിങ്ങള്‍ക്ക് തോന്നുകയാണ്‌ വിഗ്രഹം ആവശ്യമില്ല എന്നു - അങ്ങനെയെങ്കില്‍ നിങ്ങള്‍ക്ക് നേരിട്ട് പരബ്രഹ്മത്തോട് പ്രാര്‍ത്ഥിക്കാം.
ഇനി നിങ്ങള്‍ക്ക് പ്രാര്‍ത്ഥനയില്‍ വിശ്വാസമില്ലെങ്കില്‍ അതും ആവശ്യമില്ല. നിങ്ങള്‍ നിങ്ങളുടെ കര്‍മ്മം ധര്‍മ്മത്തോടെ ചെയ്യുന്നെങ്കില്‍ അതു മാത്രം മതി - നിങ്ങള്‍ ആ പരബ്രഹ്മത്തിലേക്കെത്തും.   

അതായത് നമ്മുടെ സനാതനധര്‍മ്മത്തില്‍ നമ്മള്‍ ഈ പറയുന്നവരെ ഉള്‍പ്പെടുത്തുന്നു: 
1. വിഗ്രഹം വഴി ആരാധിക്കുന്നവര്‍
2. വിഗ്രഹം വേണ്ട എന്നു വിശ്വസിക്കുന്നവര്‍ . 
3. പ്രാര്‍ത്ഥനയില്‍ വിശ്വസിക്കാത്തവര്‍ , ഈശ്വരനില്‍ വിശ്വസിക്കാത്തവര്‍ - നിരീശ്വരവാദികള്‍. 

കഴിഞ്ഞ ഒരു കൊല്ലമായി ഞാന്‍ ഭഗവദ് ഗീത വായിച്ച് അര്‍ത്ഥം അറിയാന്‍ ശ്രമിക്കുന്നു. പണ്ഡിതന്മാരായ പലരുടെയും ഭാഷ്യങ്ങള്‍ ആണ്‌ എന്നെ ഇതിനു സഹായിക്കുന്നത്. ഇത്രയും വായിച്ചതില്‍ ഇന്നു വരെ ഞാന്‍ ഗീത ഒരു പ്രത്യേക 'മത'ത്തെ ക്കുറിച്ച് പറയുന്നതായി കണ്ടില്ല. അതിലെ ഒരു ശ്ലോകം പോലും നിങ്ങള്‍ നിങ്ങളുടെ മതം പ്രചരിപ്പിക്കണമെന്നു പറയുന്നതായ് കണ്ടില്ല. 'ഞാന്‍ പറയുന്നത് മാത്രമേ ചെയ്യാവൂ" എന്നും പറയുന്നില്ല. 

അങ്ങനെയെങ്കില്‍ ഭഗവദ്ഗീത എങ്ങനെ 'ഹിന്ദു മത'ത്തിന്റേത് മാത്രമാകും ? പാശ്ചാത്യ രാജ്യങ്ങളില്‍ നിന്ന് മതം മാറി 'ഹിന്ദു മതക്കാര്‍' ആയ ആളുകള്‍ അതിനെ തങ്ങളുടെ വഴികാട്ടി ആയി കാണുന്നു. അതിനര്‍ത്ഥം അതൊരു മതപുസ്തകം എന്നല്ല. അവര്‍ നമ്മുടെ ചരിത്രത്തിലും വിശ്വാസത്തിലും ഇഷ്ടപ്പെട്ട് പഠിക്കുന്നവരാണ്‌. ഭഗവദ് ഗീതയുടെ ചരിത്രം ഇവിടത്തെ മുസ്ലീമിന്റെയും ക്രിസ്ത്യാനിയുടെയും ബുദ്ധമതക്കരുടേയും പിന്നെ "ഹിന്ദുമത'ക്കാരുടെയും കൂടിയാണ്‌. നമ്മള്‍ നമ്മുടെ ചരിത്രത്തില്‍ അഭിമാനിക്കണം. 

പ്രിയപ്പെട്ട 'ഹിന്ദു മത' വിശ്വാസികളായ ഇന്ത്യക്കാരെ ... 

മഹാഭാരതവും രാമായണവും 'ഹിന്ദു മത'ത്തിന്റെ മാത്രം ചരിത്രമല്ല. അത സകല ഹിന്ദുക്കളുടെയും , സകല ഇന്ത്യാക്കാരുടെയും ചരിത്രമാണ്‌. ഈ ചരിത്രവും ഇതിഹാസവും ഒരു 'മത'ത്തെ ക്കുറിച്ചും പറയുന്നില്ല. ഇവ സനാതനധര്‍മ്മത്തെക്കുറിച്ചാണ്‌ പറയുന്നത്. തീവ്ര 'ഹിന്ദു മത'ക്കാര്‍ ഇതെല്ലാം സ്വന്തം സ്വത്തും പാരമ്പര്യവും മാത്രമായിക്കാണുന്നുണ്ടെന്നു സോഷ്യല്‍ മീഡിയയിലെ ചില പോസ്റ്റുകളിലും കമന്റുകളിലും കാണാം. ഇതു തീര്‍ത്തും നല്ല പ്രവണതയല്ല. ഇത് സമൂഹത്തില്‍ വര്‍ഗീയത കൂട്ടുകയേ ഉള്ളൂ... അത് സനാതനധര്‍മ്മം എന്തെന്നറിയാത്തതു കൊണ്ടാണ്‌. നബിയെയോ യേശുവിനെയോ പ്രവാചകനായി കാണുന്നത് കൊണ്ട് യാതൊരു തെറ്റുമില്ല. അതുകൊണ്ട് അവര്‍ ഇന്ത്യക്കാര്‍ അല്ലാതാകുന്നുമില്ല. 

പ്രിയപ്പെട്ട മറ്റു മത വിശ്വാസികളായ ഇന്ത്യക്കാരെ ... 

നിങ്ങളുടെ മതത്തില്‍ ഒന്നോ അതിലധികമോ മതഗ്രന്‍ഥങ്ങളുണ്ടാകാം, ഒന്നോ അതിലധികമോ ഗുരുക്കന്മാരോ പ്രവാചകന്‍മാരോ ഉണ്ടാകാം. നല്ലത്! നിങ്ങള്‍ അവരെ  പിന്‍തുടര്‍ന്നോളൂ.. പക്ഷെ നിങ്ങളുടെ ചരിത്രം, പൂര്‍വ്വികര്‍, വേരുകള്‍ എല്ലാം ഇന്ത്യയുടേതാണ്‌. അഭിമാനിക്കൂ - 5000-ഇല്‍ പരം വര്‍ഷങ്ങളുടെ പഴക്കമുള്ള ലിഖിത ചരിത്രമുണ്ട് അതിനു. ആ ചരിത്രത്തില്‍ മഹാഭാരതവും രാമായണവും ഉണ്ട്. ധര്‍മ്മം, കര്‍മ്മം, യോഗം, ജ്ഞാനം, എന്നിവയെക്കുറിച്ച് അതിമനോഹരമായി ആത്മീയമായി അടുക്കും ചിട്ടയോടും കൂടി വിവരിക്കുന്ന ഭഗവദ്ഗീതയുണ്ട് ആ ചരിത്രത്തില്‍. 

ഈ ചരിത്രത്തില്‍ സുശ്രുതനും ചരകനും (6 ബി.സി.) ജീവിച്ചിരുന്നു. സുശ്രുതന്റെ 'സുശ്രുത സംഹിത' എന്ന സംസ്കൃത പുസ്തകമോ അല്ലെങ്കില്‍ അതിന്റെ ആംഗലേയ പരിഭാഷയോ വായിച്ചാല്‍ നമുക്കറിയാന്‍ സാധിക്കും 6 ബി.സി.യില്‍ നമ്മള്‍ക്ക് ഉണ്ടായിരുന്ന അറിവിന്റെ ആഴത്തെക്കുറിച്ച്. ആധുനിക വൈദ്യശാസ്ത്ര ഉപകരണങ്ങളോ ആധുനിക ചികിത്സാ രീതികളോ ഇല്ലാതിരുന്ന കാലത്താണ്‌ മനുഷ്യ ശരീരത്തിലെ ആന്തരിക അവയവങ്ങളെക്കുറിച്ചും ശസ്ത്രക്രിയ രീതികളെക്കുറിച്ചും സുശ്രുതന്‍ പുസ്തകമെഴുതുന്നത്. ഇന്നു എന്റെ ചില വിദ്യാഭ്യാസമുള്ള മുസ്ലീം സുഹൃത്തുക്കള്‍ അവരുടെ മുഖ പുസ്തകത്തില്‍ വളരെ ആശ്ചര്യമുള്ളൊരു കാര്യം എന്ന പോലെ ഇങ്ങനെ എഴുതി കണ്ടിട്ടുണ്ട് - " 1400 വര്‍ഷങ്ങള്‍ക്കു മുന്നെ ആധുനിക വൈദ്യ ഉപകരണങ്ങളില്ലാത്ത കാലത്ത് അമ്മയുടെ വയറ്റിലെ കുട്ടിയുടെ രൂപത്തെ ക്കുറിച്ച് വിശുദ്ധഖുറാനില്‍ പറയുന്നു . ഇതിനു മുമ്പെ ആരും ഇത്ര കൃത്യമായി പറഞ്ഞിട്ടില്ല" എന്ന്‌. ഈ ഒരു പോസ്റ്റ് തന്നെ അയിരത്തോളം ആള്ക്കാര്‍ തങ്ങളുടെ 'ഫേസ്‌ബുക്ക്' വഴി പ്രചരിപ്പിച്ചിട്ടുമുണ്ട്. ഞാനും ആ ശ്ലോകം അല്ലെങ്കില്‍ verse വായിച്ചിരുന്നു. ഖുറാനിലെ 23-ആം അദ്ധ്യായത്തിലെ 12,13,14 [*2] വാക്യങ്ങള്‍ ആണ്‌ ആ പറയുന്നതിനടിസ്ഥാനം. പക്ഷെ അതില്‍ ആ ബീജത്തിന്റെ വളര്‍ച്ചാഘട്ടങ്ങളെക്കുറിച്ച് പറയുന്നില്ല. അതില്‍ പറയുന്നോ ഇല്ലയോ എന്നതല്ല പ്രശ്നം - ഈ 1400 വര്‍ഷങ്ങള്‍ക്കും എത്രയോ മുന്നെ നമ്മുടെ ഇന്ത്യക്കാരുടെ സുശ്രുതന്‍ ഈ ബീജത്തിന്റെ ഓരോ മാസത്തിലെയും വളര്‍ച്ച തന്റെ സുശ്രുത സംഹിതയില്‍ [*3] വളരെ വ്യക്തമായി വിവരിക്കുന്നുണ്ട്. 'സുശ്രുത സംഹിത' എന്നത് ഒരു വൈദ്യശാസ്ത്ര ഗ്രന്‍ഥമാണ്‌. അല്ലാതെ ഒരു 'മത' ഗ്രന്‍ഥമല്ല. പക്ഷെ അറിവു അറിവു തന്നെയാണ്‌. നമ്മുടെ ചരിത്രത്തിലും പാരമ്പര്യത്തിലും ഈ അറിവുണ്ടായിട്ടും എന്തിനു മത ഗ്രന്‍ഥത്തിലെ അല്‍പമായ അറിവു പ്രചരിപ്പിക്കാന്‍ നാം ഇത്ര ശുഷ്കാന്തി കാണിക്കുന്നു. വിദ്യാഭ്യാസമുള്ളവര്‍ തന്നെയാണ്‌ ഇത് പ്രചരിപ്പിക്കുന്നതിലും മുന്നിട്ട് നില്‍ക്കുന്നത്. ഖുറാനില്‍ പറഞ്ഞിരിക്കുന്നത് വളരെ നല്ലതു തന്നെ. പക്ഷെ അതിനും മുന്നെ നമ്മുടെ ഇന്ത്യയില്‍ ഇതെല്ലാം വ്യക്തമായി പറഞ്ഞിട്ടുണ്ട് എത്രയോ പേര്‍. അതിലും അഭിമാനിക്കൂ... 

അതു പോലെ നമ്മുടെ ചരിത്രത്തിന്റെ ഭാഗമാണ്‌ ആയുര്‍വേദ ചികിത്സാ രീതി, യോഗ രീതി, എന്നിവ. ലോകത്തിലെ ആദ്യ വിശ്വവിദ്യാലയം (University) നമ്മുടെ ഇന്ത്യയിലെ നളന്ദയാണ്‌ [*4]. നളന്ദ ഒരിക്കലും 'ഹിന്ദു മത'ത്തിന്റെ അല്ല. അത് ഈ 80 ശതമാനത്തിന്റെയും 20 ശതമാനത്തിന്റെയും ചരിത്രത്തിന്റെ ഭാഗമാണ്‌. സംസ്കൃതഭാഷയും നമ്മുടേതാണ്‌. ഇംഗ്ലീഷും അറബിയും പഠിക്കുന്നത് നല്ലതു തന്നെ. പക്ഷെ സംസ്കൃതം അറിയുന്നത് തെറ്റല്ല. അത് ഇന്ത്യയുടെ ചരിത്രത്തിന്റെ ഭാഗമാണ്‌. അതില്‍ ഊറ്റം കൊണ്ടാലോ അഭിമാനിച്ചാലോ അത് ആരുടെയും 'മത'ത്തിനെതിരല്ല. അത് ഒരു മതത്തെയും താഴ്ത്തികെട്ടുന്നതുമല്ല.

ഇനി "വസുധൈവ കുടുംബകം", "ലോകമേ തറവാട്", അല്ലെങ്കില്‍ "രാജ്യ അതിര്‍ത്തികള്‍ ആവശ്യമില്ല" എന്നാണ്‌ നിങ്ങള്‍ വിശ്വസിക്കുന്നതെങ്കില്‍ പാരമ്പര്യത്തിലോ ചരിത്രത്തിലോ അഭിമാനിക്കേണ്ട - പക്ഷെ അറിഞ്ഞിരിക്കുക - സത്യം വസ്തുനിഷ്ഠമായി തന്നെ അംഗീകരിക്കുക, നല്ലവ ഇഷ്ടമുണ്ടെങ്കില്‍ സ്വീകരിക്കുക.

ഇനി ഏതു മതത്തില്‍പെട്ടവരായാലും ... 

സമീപകാല ഇന്ത്യാ ചരിത്രത്തില്‍ പ്രത്യേകിച് ഏ.ഡി യില്‍ സതി എന്നൊരു സമൂഹിക ദുരാചാരം ഇന്ത്യയിലെ ചില പ്രദേശങ്ങളില്‍ നില നിന്നിരുന്നു. മതം മാറാത്ത ഇന്ത്യക്കാരുടെ ഇടയിലും പിന്നെ ചില സിഖുകാരുടെ ഇടയിലും ചില ഇന്ത്യന്‍ ഇസ്ലാം മത വിശ്വാസികളുടെ ഇടയിലും സതി അനുഷ്ഠിച്ചവരുണ്ട്. ഇത് നമ്മുടെ ചരിത്രത്തിലോ സംസ്കാരത്തിലോ കടന്നുകൂടിയ ഒരു തെറ്റായ ആചാരമാണ്‌. ഇതിനെതിരെ നമ്മള്‍ ഇന്ത്യാക്കാരുടെ ഇടയില്‍ നിന്നു തന്നെ പോരാടാന്‍ രാജാറാം മോഹന്‍ റായിയെ പോലുള്ള ആളുകള്‍ ഉണ്ടായിരുന്നു.

നമ്മുടെ പ്രാചീന ഇന്ത്യയില്‍ വേദിക് കാലഘട്ടത്തില്‍ ഒരാളുടെ ജോലിക്കനുസരിച്ച് 4 വര്‍ണങ്ങള്‍ ഉണ്ടായിരുന്നു. വേദം പഠിച്ചവന്‍ ബ്രാഹ്മണന്‍, രാജ്യ സുരക്ഷ ചെയ്യുന്നവന്‍ ക്ഷത്രിയന്‍ , സ്വന്തമായി വ്യാപാരം ചെയ്യുന്നവന്‍ വൈശ്യന്‍, മറ്റൊരാളുടെ സ്ഥാപനത്തിലോ അല്ലെങ്കില്‍ മറ്റൊരാള്‍ക്ക് വേണ്ടിയോ പണിയെടുക്കുന്നവന്‍ ശൂദ്രന്‍. എന്നാല്‍ കാലക്രമേണ ഇതില്‍ ഉച്ചനീചത്വങ്ങള്‍ കടന്നു കൂടി. ഉചനീചത്വങ്ങള്‍ ബ്രാഹ്മണന്റെ വേദം പഠിക്കാത്ത മകനെയും ബ്രാഹ്മണനാക്കി - അങ്ങനെ നാനാവിധ ജാതികള്‍ ഉണ്ടായി. ഇത് ഒരു സാമൂഹിക വിപത്തായി തന്നെ മാറി. ഈ സാമൂഹിക വിപത്തും നമ്മുടെ ചരിത്രത്തിന്റെ ഭാഗമാണ്‌. പക്ഷെ അതിനെതിരെ പോരാടാന്‍ നമ്മള്‍ ഇന്ത്യക്കാര്‍ക്കായി. ഇന്നും ആ പോരാട്ടം തുടരുന്നു. ആ പോരാട്ടം നമ്മുടെ പാരമ്പര്യത്തിന്റെ നന്മയല്ലേ കുറിക്കുന്നത്?
കേരളത്തിലെ നമ്പൂതിരി സമൂഹത്തിലെ പ്രത്യേകിച്ച് ആ സമൂഹത്തിലെ സ്ത്രീകള്‍ക്ക് വേണ്ടി വി.ടി.യെ പോലുള്ളവര്‍ പോരാടി - അന്നത്തെ ചട്ടങ്ങളെ എതിര്‍ത്തു.. അതു പോലെ ജാതി വ്യവസ്ഥക്കെതിരെ അയ്യങ്കാളിയെപോലുള്ളവര്‍ പോരാടി. ഇനിയും നമ്മുടെ ഇടയില്‍ നില നില്‍ക്കുന്ന സമൂഹ്യ വിപത്തുകള്‍ക്കെതിരെ നമ്മള്‍ ഒറ്റകെട്ടായി പോരാടണം. ഇവിടെ 80 ഉം 20 ഉം മാറി നില്‍ക്കേണ്ട ആവശ്യമില്ല.

നമ്മുടെ ചരിത്രം നമ്മുടെ എല്ലാവരുടെയുമാണ്‌. മഹാഭാരതവും (ഭഗവദ് ഗീത അതില്‍ ഉള്‍പ്പെടുന്നു) രാമായണവും ഇന്ത്യയിലെ ഹിന്ദുവിന്റെയും മുസ്ലീമിന്റെയും ക്രിസ്ത്യാനിയുടെയും ചരിത്രത്തിന്റെ ഭാഗമാണ്‌.

ഇത് ഒരു സത്യമായ വസ്തുതയാണ്‌. അത് തള്ളിക്കളയാനാകില്ല.
എന്നു പറഞ്ഞു നിങ്ങല്‍ നിങ്ങളുടെ പ്രാര്‍ത്ഥനാ രീതികളോ ആരാധനാ രീതികളോ മാറ്റണമെന്നല്ല. ചരിത്രത്തെ അറിയുന്നത് അറിവിനു വേണ്ടിയാണ്‌. വേരുകളെ അറിയുന്നതിനാണ്‌.

നമ്മളുടെ ആരാധനാ രീതികള്‍ വ്യതസ്തമായിരിക്കാം. പക്ഷെ ആ നാനാതത്വത്തിലും ഏകത്വമുണ്ടാകുന്നത് നമ്മുടെ പാരമ്പര്യം ഒന്നായതു കൊണ്ടാണ്‌. - സനാതന ധര്‍മ്മം.

സനാതന ധര്‍മ്മം പ്രകാരം നിങ്ങള്‍ക്ക് പരബ്രഹ്മത്തിലേക്കെത്താന്‍ അനേകം മാര്‍ഗ്ഗങ്ങളുണ്ട്. പരബ്രഹ്മം എന്നാല്‍ അരൂപിയായ ശക്തി. അള്ളാഹുവെന്നോ യഹോവയെന്നോ കൃഷ്ണനെന്നൊ വിളിക്കാം. അല്ലെങ്കില്‍ ഒരു ഗുരുവിലൂടെയോ നിങ്ങള്‍ക്ക് പരബ്രഹ്മത്തിലെത്താം. അതു കൊണ്ടാണ് പഴയ ഇന്ത്യന്‍ രാജാക്കന്മാരും പ്രജകളും വിദേശികളായ മറ്റു മതസ്ഥര്‍ നമ്മുടെ നാട്ടില്‍ വന്നപ്പോള്‍ അവരെ ഇവിടെ മതം പ്രചരിപ്പിക്കാന്‍ സമ്മതിച്ചത്. കാരണം മതമേതായാലും പ്രാര്‍ത്ഥന എങ്ങനെയായാലും ആ വലിയ ശക്തി - അത് ഒന്നു തന്നെയാണ്‌.


[*1]
ഇവിടെ അഭയാര്‍ത്ഥികളായി വന്നു കൂടിയ ചിലര്‍ കൂടിയുണ്ട് - ഇറാനില്‍ നിന്നും ഇസ്രായേലില്‍ നിന്നുമെല്ലാം .. അവര്‍ ഇന്ത്യക്കാരെ കല്യാണം കഴിച്ച് നമ്മുടെ സംസ്കാരത്തിന്റെ ഭാഗമായി മാറി. 

[*2]
സത്യവിശ്വാസികള്‍ എന്ന 23-ആം അദ്ധ്യായത്തിലാണ്‌ ഇതുള്ളത്. ഈ വരികള്‍ എടുത്തിരിക്കുന്നത് www.quran.com/23, www.http://quranmalayalam.com/quran/malar/23.htm എന്നീ വെബ്സൈറ്റുകളില്‍ നിന്നാണ്‌.

Surat Al-Mu'minūn (The Believers)

23:12 And certainly did We create man from an extract of clay.23:13 Then We placed him as a sperm-drop in a firm lodging.23:14 Then We made the sperm-drop into a clinging clot, and We made the clot into a lump [of flesh], and We made [from] the lump, bones, and We covered the bones with flesh; then We developed him into another creation. So blessed is Allah , the best of creators.23:15 Then indeed, after that you are to die.


23:12 തീര്‍ച്ചയായും മനുഷ്യനെ കളിമണ്ണിന്‍റെ സത്തില്‍ നിന്ന്‌ നാം സൃഷ്ടിച്ചിരിക്കുന്നു.23: 13 പിന്നീട്‌ ഒരു ബീജമായിക്കൊണ്ട്‌ അവനെ നാം ഭദ്രമായ ഒരു സ്ഥാനത്ത്‌ വെച്ചു.23:14 പിന്നെ ആ ബീജത്തെ നാം ഒരു ഭ്രൂണമായി രൂപപ്പെടുത്തി. അനന്തരം ആ ഭ്രൂണത്തെ നാം ഒരു മാംസപിണ്ഡമായി രൂപപ്പെടുത്തി. തുടര്‍ന്ന്‌ നം ആ മാംസപിണ്ഡത്തെ അസ്ഥികൂടമായി രൂപപ്പെടുത്തി. എന്നിട്ട്‌ നാം അസ്ഥികൂടത്തെ മാംസം കൊണ്ട്‌ പൊതിഞ്ഞു. പിന്നീട്‌ മറ്റൊരു സൃഷ്ടിയായി നാം അവനെ വളര്‍ത്തിയെടുത്തു. അപ്പോള്‍ ഏറ്റവും നല്ല സൃഷ്ടികര്‍ത്താവായ അല്ലാഹു അനുഗ്രഹപൂര്‍ണ്ണനായിരിക്കുന്നു.23:15 പിന്നീട്‌ തീര്‍ച്ചയായും നിങ്ങള്‍ അതിനു ശേഷം മരിക്കുന്നവരാകുന്നു.
[*3] 
സുശ്രുത സംഹിത

'ശസ്ത്രക്രിയയുടെ പിതാവാ'യാണ്‌ സുശ്രുതന്‍ ലോകം മുഴുവന്‍ അറിയപ്പെടുന്നത്

The Sushruta Samhita is a Sanskrit redaction text on surgery. The original work is attributed to Sushruta, a historical physician from the sixth century BC Varanasi. Maharishi Shushruta is a legendry scholar of the Indian medical science and founding father of surgery. 2600 Yrs ago Maharishi Shushruta together with his colleagues had conducted the variety of complex surgeries such as caesareans, artificial limbs, cataract, urinary stones, fractures, and most specially the plastic surgery. The Sushruta Samhita, in its current form, contains 184 chapters and description of 1120 illnesses, 700 medicinal plants, 64 preparations from mineral sources and 57 preparations based on animal sources.

The text discusses surgical techniques of making incisions, probing, extraction of foreign bodies, alkali and thermal cauterization, tooth extraction, excisions, and trocars for draining abscess draining hydrocele and ascitic fluid, the removal of the prostate gland, urethral stricture dilatation, vesiculolithotomy, hernia surgery, caesarian section, management of haemorrhoids, fistulae, laparotomy and management of intestinal obstruction, perforated intestines, and accidental perforation of the abdomen with protrusion of omentum and the principles of fracture management, viz., traction, manipulation, appositions and stabilization including some measures of rehabilitation and fitting of prosthetics. It enumerates six types of dislocations, twelve varieties of fractures, and classification of the bones and their reaction to the injuries, and gives a classification of eye diseases including cataract surgery.

The text was translated to Arabic as Kitab-i-Susrud in the eighth century.

ഇത് സുശ്രുതസംഹിതയുടെ ഇംഗ്ലീഷ് ഭാഷ്യം :  https://archive.org/details/englishtranslati00susruoft

[*4]
നളന്ദ വിശ്വവിദ്യാലയം
മതത്തിന്റെയും വൈദേശിക ആക്രമണങ്ങളുടേയും പേരില്‍ ഇന്ത്യക്ക് നഷ്ടപ്പെട്ടു പോയ അറിവിന്റെ ഭണ്ഢാരം.

Nālandā was an ancient higher-learning institution in Bihar, India existed from fifth century AD to 1197 AD. Nalanda University was one of the world's first residential university as it had dormitories for students. It is also one of the most famous universities. In its heyday, it accommodated over 10,000 students and 2,000 teachers.The university was considered an architectural masterpiece. Nalanda had eight separate compounds and ten temples, along with many other meditation halls and classrooms. On the grounds were lakes and parks. The library was located in a nine storied building where meticulous copies of texts were produced. According to records of history, Nalanda University was destroyed three times by invaders, but only rebuilt twice. The final blow came when it was violently destroyed in an Turkish attack led by Bakhtiyar Khilji in 1193. This event is seen by scholars as a late milestone in the decline of Buddhism in India. The Persian historian Minhaj-i-Siraj, in his chronicle the Tabaqat-i Nasiri, reported that thousands of monks were burned alive and thousands beheaded as Khilji tried his best to uproot Buddhism.

23 Jul 2014

'വിശ്വാസ കേരളം'

ആരാ പറഞ്ഞേ കേരളത്തില്‍ മത സൌഹാര്‍ദ്ദമില്ലെന്നു...? അന്ധവിശ്വാസത്തിന്റെ കാര്യത്തിലും എത്ര വിദ്യാഭ്യാസമുണ്ടെങ്കിലും എല്ലാ തട്ടിപ്പിനും "എന്നെ നിങ്ങടെ ഇരയാക്കൂ" എന്നും പറഞ്ഞു തല വെച്ചു കൊടുക്കുന്നതിലും നമ്മള്‍ മലയാളികള്‍ ഐക്യത്തോടെ ജാതിമതഭേദമില്ലാതെ വര്‍ത്തിക്കുന്നു...

ഇപ്പൊ കരുനാഗപ്പിള്ളിയില്‍ ജിന്നൊഴിപ്പിക്കലിനിടയില്‍ സിറാജുദ്ദീന്‍ എന്ന ആളുടെ ചവിട്ടേറ്റ് മരിച്ച ഹസീനയുടേത് ഒരു ഒറ്റപ്പെട്ട സംഭവമല്ല.മലയാളിയുടെ ഈ 'വിശ്വാസ'വും അമിതമായ ആഗ്രഹങ്ങളും ചുളുവില്‍ ദൈവത്തിന്റെ പ്രീതിയൊപ്പിക്കാനുള്ള തൃഷ്ണയും എത്ര മനോഹരമായി ചൂഷണം ചെയ്യപ്പെടുന്നെന്നോ..

മന്ത്രവാദ സേവ നടത്താനറിയുമെന്നു പറഞ്ഞു യന്ത്രവും മന്ത്രവും കൊടുക്കുന്ന മന്ത്രവാദികള്‍, വായുവില്‍ നിന്ന് ശിവലിംഗവും മറ്റും കൊടുക്കുന്ന തട്ടിപ്പ് വീരന്മാര്‍, പിന്നെ ധ്യാനത്തിനിടയില്‍ ഹല്ലേലൂയ്യ പാടി വിശ്വാസിയുടെ ദേഹത്തിലെ 983 ബാധകളെ (നമ്പര്‍ correct ആയി ഓര്‍മയില്ല.. അങ്ങനെയൊരു 'കിറുകൃത്യ' നമ്പറാണ്‌ പറഞ്ഞത്) ഒഴിപ്പിച്ച വികാരിയച്ചന്‍.... അങ്ങനെ എത്രയെത്ര ഉദാഹരണങ്ങള്‍ നേരിട്ടും അല്ലാതെയും കണ്ടിരിക്കുന്നു...

റിപ്പോര്‍ട്ടര്‍ ചാനലില്‍ 'കാണാത്ത കേരളം' എന്നൊരു പരിപാടിയുണ്ട്. ചാനല്‍ പ്രവര്‍ത്തകര്‍ ഇല്ലാക്കഥകളും ഇല്ലാപ്രശ്നങ്ങളും ഉണ്ടാക്കി ഈ വക 'മഹാന്മാരെ' തിരഞ്ഞ് കണ്ടുപിടിച്ച് അവരുടെ അടുത്ത് സഹായം തേടുന്നതിനൊപ്പം തന്നെ അത് ഒളി ക്യാമറ വെച്ച് ഷൂട്ട് ചെയ്തു കാണിക്കുന്ന ഒരു പരിപാടിയാണ്‌ അത്.

വിശുദ്ധന്മാരെയും മന്ത്രവാദികളെയും സ്വയം ദൈവമെന്നു വിശ്വസിക്കുന്നവരെയും തേടുന്നതിനിടയില്‍ ചിലപ്പോള്‍ റിപ്പോര്‍ട്ടര്‍മാര്‍ ആത്മീയതിയിലൂന്നി ജീവിക്കുന്ന നല്ലവരായ ചിലരുടെ അടുത്തും എത്തുന്നുണ്ട്. അവരെ അതേ നന്മയോട് കൂടി തന്നെ നമ്മളിലേക്കെത്തിക്കുകയും ഇവര്‍ ചെയ്യുന്നുണ്ട്. ( ഭാവിയില്‍ ഇവര്‍ വലിയ തട്ടിപ്പ് പ്രസ്ഥാനങ്ങളാകുമോ എന്തോ.. )

കൊല്ലത്ത് സ്വയം അന്ത്യപ്രവചകനായും വി. യൂദാസ്ലീഹയെ ഇടക്കിടെ കാണാറുണ്ടെന്നും പറയുന്ന, കല്‍ക്കി അവതാരം എന്നു സ്വയം പറയുന്ന അച്ചന്‍ പട്ടം ലഭിച്ചിട്ടുണ്ടെന്നു ചുമ്മാ അവകാശവാദം ഉന്നയിക്കുന്ന ജോര്‍ജ്ജുകുട്ടി എന്നൊരദ്ദേഹം... 300 കോടിയുടെ ജെറുസലേം ദേവാലയം എന്നു വിളിക്കുന്ന ഒരു പള്ളി ഉണ്ടാക്കി തുടങ്ങിയ ഇദ്ദേഹം ഒരു Illusion World-ല്‍ ആണ്. അയാളുടെ സംസാരം കേള്‍ക്കുമ്പൊ തന്നെ സാമാന്യബുദ്ധിയുള്ള ആര്‍ക്കും സംഗതി മനസ്സിലാകും. പിന്നെ ...
റിപ്പോര്‍ട്ടേഴ്സ് കാണാതെ പോയെന്നു പറഞ്ഞ ഇല്ലാത്ത ലാപ്ടോപും പാസ്പോര്‍ട്ടും കട്ടെടുത്ത് കൊണ്ട്പോയത് ആരാണെന്നു ഭാവനയോട് കൂടി 'മഷിനോട്ടത്തിലൂടെ' കണ്ടെത്തി പറയുന്ന ഒരില്ലത്തെ നമ്പൂതിരിയുടെ ശിങ്കിടി സ്ത്രീ... മുസ്ലിം പള്ളിയും അമ്പലവും ചേര്‍ന്ന് സൌഹാര്‍ദ്ദത്തോടേ നടത്തുന്ന ഭ്രാന്തിനുള്ള മന്ത്രവാദ ചികിത്സ...


മലയപ്പൂപ്പന്‍മാരുടെ ഉപദേശങ്ങള്‍ ഒരു ശംഖിലൂടെ കേട്ട് തന്റടുക്കല്‍ വരുന്ന വിശ്വാസികളുടെ പ്രശ്നങ്ങള്‍ക്ക് പരിഹാരമായി കൂടോത്രം വരെ ചെയ്യുന്ന മഹാന്‍ - അയാള്‍ ഈ വിശ്വാസി ചമഞ്ഞ റിപ്പോര്‍ട്ടറുടെ ഏട്ടനെ കൊല്ലാന്‍ വരെ തയ്യാറാകുന്നുണ്ട്... ! അതു പോലെ ഇരുപതിനായിരത്തോളം ബാധകള്‍ ഒഴിച്ചിട്ടുള്ള യുവതിയായ താര എന്ന ആള്‍ദൈവം ..

'ചികിത്സ'യ്ക്കൊപ്പം മന്ത്രവും ചെയ്യുന്ന, കാര്യങ്ങള്‍ ഗണിച്ച് മനസ്സിലാക്കാന്‍ പറ്റുന്ന കണ്ണൂരുകാരന്‍ റഹീമുസ്താദ്... ദൈവിക ശക്തികള്‍ ഉണ്ടെന്നു പറയുന്ന, അനേകം വിശ്വാസികള്‍ ഉള്ള, അത്ഭുതങ്ങള്‍ ചെയ്തിട്ടുണ്ടെന്നു അവകാശപ്പെടുന്ന ബുദ്ധിയുള്ളവരെ ചിരിപ്പിക്കുന്ന ദൈവത്തെ കണ്ടിട്ടുള്ള മേരി വര്‍ഗീസ് എന്ന ചെമ്പകപ്പാറ അമ്മച്ചി... (അമ്മച്ചിയേ ശരണം ..! ) അങ്ങനെ അങ്ങനെ എത്രയെത്ര ആള്‍ക്കാര്‍... (ഇതിലെ ചിലരെ മാത്രമേ എനിക്കിപ്പൊ ഓര്‍മയുള്ളൂ) ..

പിന്നെ നമ്മുടെ ഉമ്മന്‍ചാണ്ടി അടക്കമുള്ള രാഷ്ട്രീയ നേതാക്കള്‍ടെ പേരു പറഞ്ഞ, വലിയ ആളുകള്‍ തന്റടുത്ത് മാരകക്രിയകള്‍ക്ക് വരുന്നുണ്ടെന്ന് പറഞ്ഞ ഒരു നുണയന്‍ തട്ടിപ്പ് വീരന്‍... തൃശ്ശൂര്‍ ജില്ലയിലെ ചെറുതും വലുതുമായ ചാത്തന്‍ മഠങ്ങള്‍... റിപ്പോര്‍ട്ടറുടെ ഇല്ലാത്ത ബിസിനസ്സിന്റെ അഭിവൃദ്ധിക്ക് തടസ്സമുണ്ടാക്കുന്ന കാരണങ്ങള്‍ കണ്ടെത്തി പരിഹാരം പറഞ്ഞിരിക്കുന്നു ചാത്തന്മാര്‍... പിന്നെ അതിലും വലുതാ ഈയടുത്ത് കണ്ടത് - മിമിക്രിയും മറ്റു വശമുള്ള, വേണമെങ്കില്‍ ഭദ്രകാളിയെ വരെ കൊല്ലാന്‍ തയ്യാറായ ജിന്നൊഴിപ്പിക്കല്‍ വീരന്‍ അഹ്‌മദ് ഹാജി... (അങ്ങോരു പുലിയാണ്‌ ട്ടോ... എന്ത് മനോഹരമായാ വിശ്വാസികളെ പറ്റിക്കുന്നത്!)

ഇതിലെയൊക്കെ തമാശ എന്താന്നറിയ്യോ - ഇവരെ കാണാന്‍ വരുന്നതില്‍ എല്ലാ മതവിഭാഗക്കാരുമുണ്ട്. അതും ഈ റിപ്പോര്‍ട്ടേഴ്സിന്റെ കള്ള കഥകള്‍ക്കുള്ള പരിഹാരം കേട്ടു മടങ്ങുമ്പോ ഇതേ തട്ടിപ്പ് വീരനെ കാണാന്‍ Queue-ഇല്‍ വിശ്വാസികളായ ആളുകള്‍ കേറാനായി നില്‍ക്കുന്നുണ്ടാകും...

മന:ശ്ശാന്തി തേടി വിശ്വാസികള്‍ ചെയ്യുന്ന പ്രാര്‍ത്ഥനകളും ആചാരങ്ങളും നമ്മള്‍ കാണുന്നുണ്ട്.. അതിന്റെ പേരില്‍ പള്ളി അമ്പലം എന്നിവ സന്ദര്‍ശിക്കുന്നവരെ നമുക്ക് മനസ്സിലാക്കാം... ആത്മീയ പ്രഭാഷണങ്ങള്‍ നടത്തുന്ന ആത്മീയ ഗുരുക്കളെ കണ്ടെത്തുന്നവരും ഉണ്ട്. അത് ആരെയും ബുദ്ധിമുട്ടിക്കുന്നില്ല. പക്ഷെ ഇത്തരം വിശ്വാസങ്ങള്‍ക്ക് ഒരു പരിധിയുണ്ട്. അത് നിങ്ങളെ അടിമയാക്കരുത്.. ആരുടെയും ചൂഷണത്തിനിരയാകാനും സമ്മതിക്കരുത്..

ദൈവത്തോട് കാര്യങ്ങള്‍ പറയാന്‍ തന്ത്രിയോ പ്രവാചകനോ വിശുദ്ധനോ ആവശ്യമുണ്ടോ ? ആ... !

(ഇത്രേം പറഞ്ഞതല്ലേ - ഇനി എന്റെ മേല്‍ വല്ല ബാധ കൂടീട്ടുണ്ടങ്കിലോ... ഞാനും പോകട്ടെ ഒരു ബാധയൊഴിപ്പിക്കല്‍ കേന്ദ്രത്തിലേക്ക്... നായിന്റെ വാല്‍ പന്തീരാണ്ടുകൊല്ലം കുഴലിലിട്ടാലും എത്ര MBA വരെ പഠിച്ചാലും വളഞ്ഞെ ഇരിക്കൂ...)